“Qur’ani inaiwekaje nafsi yetu kama kioo mbele yetu?”

Kuna kauli maarufu ambayo wakati mwingine hudhaniwa kuwa ni hadithi, na pia inaweza kutoeleweka ipasavyo: “Yeyote anayejitambua, humtambua Mola wake.” Mojawapo ya maelezo bora ambayo wanazuoni wametoa kuhusu kauli hii ni kwamba: kujua udhaifu wetu na uhitaji wetu hutuweka wazi kuona tofauti kati ya kiumbe na Muumba, na kutufanya tuthamini ukamilifu wa Mwenyezi Mungu ﷻ na utegemezi wetu kamili Kwake.

“Ufahamu wa nafsi una nafasi gani tunapotafakari Qur’ani?”

Hili linaonesha wazi umuhimu wa UFAHAMU WA NAFSI au Kujitambua. Kadri ninavyojijua vizuri zaidi, ndivyo ninavyoweza kuiruhusu Qur’ani iingie katika nafsi iliyo tayari kupokea, iliyo tayari kujihisabu na kusonga kuelekea kujiboresha. Hii ni njia mojawapo ya kuelewa dhana ya “nafsi inayojilaumu” (al-nafs al-lawwāmah) inayotajwa katika aya ya sura Al-Qiyāmah:

“Mimi nina nafasi gani katika mchakato huu?”

Qur’ani ni mazungumzo yanayokuza na kurekebisha maadili, na Muumba anajua vyema zaidi namna ya kumfundisha mja Wake, na kile ambacho mja anahitaji. Lakini pia kuna jukumu ulilonalo wewe mwenyewe katika kupata mwanga huo: kwa kuupa ujumbe umakini, na kwa kuelewa umuhimu wake na athari zake KWAKO.

Kwa haki kabisa, tunamkosoa mtu asiye na ufahamu wa nafsi, anayesikia ujumbe lakini hafikiri unamhusu yeye (anayeuliza: “Nani? Sio mimi?!”), kisha anawanyooshea wengine vidole. Ni pale unapokuwa macho juu ya hali zako halisi (ikiwemo dhambi na kasoro za tabia) ndipo unakuwa mnyenyekevu wa kutosha kuchukua mawaidha.

“Hivyo, hili linamaanisha nini katika Lenzi ya Tafakari?”

Linamaanisha kwamba ninasoma Qur’ani nikiitazama nafsi yangu mwenyewe, jambo linalonisaidia kutambua maana na uzito wa kile ambacho Mwenyezi Mungu ﷻ anasema. Ninahisi uharaka wa ujumbe huo, nikijua kwamba huenda kuna watu wengi wengine kama mimi wanaohitaji maelekezo hayo. Uelewa wangu wa nafsi yangu ni sehemu ya kuelewa maumbile ya mwanadamu kwa ujumla, na hilo ni jambo muhimu sana katika kuielewa Qur’ani kwa usahihi.

Hebu turudi kwenye wazo la UMUHIMU / UHALISIA lililotajwa katika Siku ya 7. Tunaposoma aya zinazozungumzia makafiri, kwa mfano, tunaweza ama kuziacha zipite tu bila kutugusa… au tujitazame sisi wenyewe kuona kama kuna sifa yoyote tunayoshiriki nao. Njia hii ya pili ndiyo yenye manufaa zaidi kwa wale wanaotaka kubadilishwa na Qur’ani.

Tunaweza kuunganisha hili na kanuni iliyotajwa na Imam al-Ghazali, aliyesema: “Kama watu wote wangeacha tu yale wanayoyachukia kwa wengine, wasingehitaji mtu wa kuwalea au kuwaadhibu.” Na imeripotiwa kwamba Nabii Isa (amani iwe juu yake) aliulizwa: “Nani aliyekufundisha?” Akajibu: “Sikufundishwa na mtu yeyote. Niliona ujinga wa mjinga, nikauepuka.”

Vivyo hivyo, tunaweza kupata funzo kwa nafsi zetu katika kila kauli ya Qur’ani, na sehemu muhimu ya kukuza ujuzi huu (kwa kua ni ujuzi bila shaka!) ni kujifahamu kwa kina kadri tuwezavyo.